Stefnur

Eftirfarandi eru þær stefnur sem Capacent ehf., kt. 521022-0350, tekur mið af í starfsemi sinni og taka til sjálfbærni, persónuverndar, stjórnhátta ásamt stefnu í starfsmanna- og jafnlaunamálum. Stefnur þessar eru uppfærðar reglulega og þegar tilefni er til endurskoðunar.

■ SJÁLFBÆRNI
Capacent leitast við að hafa sjónarmið um sjálfbærni og samfélagslega ábyrgð í fyrirrúmi í starfsemi sinni. Við trúum því að með því að sýna samfélagslega ábyrgð og nýta sjálfbærar lausnir stuðlum við að hagkvæmni og sköpum ótvíræðan ávinning fyrir samfélagið í heild. Við leggjum okkur fram við að taka mið af sjálfbærni­markmiðum í starfsemi okkar eins og þau eru sett fram í Heims­markmiðum Sameinuðu þjóðanna um sjálfbæra þróun. Heimsmarkmið Sameinuðu þjóðanna taka til þriggja megin stoða sjálfbærrar þróunar sem eru umhverfisleg, félagsleg og efna­hagsleg og virka saman sem ein heild.

Við leggjum upp með að hafa sjálfbærni að leiðarljósi og hvetjum viðskiptavini og samstarfsaðila okkar til að gera slíkt hið sama. Við höldum umhverfisáhrifum af starfsemi okkar í lágmarki og leitumst m.a. við að nýta vistvænar samgöngur, notast við endur­nýjanlega orku og leggja stund á ábyrga meðhöndlun úrgangs. Með þessum hætti leggjum við okkar lóð á vogaskálarnar til að skapa betra samfélag, hafa jákvæð áhrif á umhverfi okkar og búa í haginn fyrir sjálfbæra framtíð.

■ PERSÓNUVERNDARSTEFNA CAPACENT

Persónuvernd skiptir máli, okkur er umhugað um öryggi og verndun þeirra gagna sem við meðhöndlum og verða til í starfsemi okkar. Capacent leggur áherslu á öryggi og vernd persónuupplýsinga og vinnur með þær í samræmi við lög nr. 90/2018 um persónuvernd og vinnslu persónuupplýsinga, almenna persónuverndarreglugerð ESB (GDPR) og aðrar reglur sem gilda hverju sinni. Með því að nýta þjónustu Capacent samþykkir þú söfnun og meðhöndlun félagsins á upplýsingum samkvæmt þessari persónuverndarstefnu.

MARKMIÐ OG GILDISSVIÐ

Capacent kann að safna, vinna og varðveita persónuupplýsingar bæði sem ábyrgðaraðili og vinnsluaðili. Stefna þessi tekur til persónuupplýsinga sem unnið er með í starfsemi félagsins, m.a. vegna ráðningarþjónustu, ráðgjafarverkefna, viðskipta og samskipta við viðskiptavini, umsækjendur, starfsfólk, samstarfsaðila og aðra tengiliði.

Markmið stefnunnar er að upplýsa um hvernig Capacent safnar, vinnur, varðveitir og eftir atvikum miðlar persónuupplýsingum.

SÖFNUN OG VINNSLA PERSÓNUUPPLÝSINGA

Capacent vinnur aðeins með persónuupplýsingar sem eru nauðsynlegar og málefnalegar með hliðsjón af tilgangi vinnslunnar. Upplýsingarnar geta m.a. verið nafn og samskiptaupplýsingar, starfs- og menntunarupplýsingar, ferilskrá, upplýsingar úr ráðningarferli, samnings- og viðskiptaupplýsingar og önnur gögn sem nauðsynleg eru vegna þeirrar þjónustu sem veitt er.

Upplýsingar geta komið frá hinum skráða sjálfum, viðskiptavinum, umsagnaraðilum, opinberum skrám eða öðrum lögmætum og opinberlega aðgengilegum heimildum.

Vinnsla persónuupplýsinga byggist eftir atvikum á samningi, lagaskyldu, samþykki hins skráða eða lögmætum hagsmunum Capacent eða viðskiptavina félagsins.

UMSÆKJENDUR OG RÁÐNINGAR

Við ráðningar vinnur Capacent m.a. með upplýsingar úr umsóknum og ferilskrám, um menntun og starfsreynslu, viðtöl, umsagnir og eftir atvikum niðurstöður hæfnis- eða annarra matsprófa.

Upplýsingarnar eru notaðar til að meta hæfi umsækjenda og miðla viðeigandi upplýsingum til viðskiptavina Capacent vegna ráðningar. Upplýsingar geta jafnframt verið varðveittar vegna annarra starfstækifæra þegar viðeigandi heimild er til þess.

Capacent kann einnig að hafa samband við einstaklinga vegna starfstækifæra á grundvelli upplýsinga sem þeir hafa sjálfir gert opinberar í faglegum tilgangi.

RÁÐGJAFARVERKEFNI

Við framkvæmd ráðgjafarverkefna kann Capacent að vinna með persónuupplýsingar sem nauðsynlegar eru til að veita umbeðna þjónustu. Þegar Capacent vinnur persónuupplýsingar fyrir hönd viðskiptavinar sem vinnsluaðili fer vinnslan fram samkvæmt fyrirmælum viðkomandi ábyrgðaraðila og gildandi vinnslusamningi.

MIÐLUN UPPLÝSINGA

Capacent afhendir persónuupplýsingar ekki óviðkomandi. Upplýsingum kann þó að vera miðlað til viðskiptavina, þjónustu- og vinnsluaðila, opinberra aðila eða annarra þegar það er nauðsynlegt vegna þjónustunnar, byggist á lögmætri heimild eða leiðir af lögum.

Séu persónuupplýsingar fluttar utan Evrópska efnahagssvæðisins skal þess gætt að viðeigandi lagagrundvöllur og verndarráðstafanir séu fyrir hendi.

ÖRYGGI OG VARÐVEISLA

Capacent beitir viðeigandi tæknilegum og skipulagslegum öryggisráðstöfunum til að vernda persónuupplýsingar gegn óheimilum aðgangi, breytingum, miðlun, glötun eða eyðingu.

Persónuupplýsingar eru ekki varðveittar lengur en nauðsynlegt er miðað við tilgang vinnslunnar, nema lög eða aðrar lögmætar ástæður krefjist eða heimili lengri varðveislu. Þegar Capacent starfar sem vinnsluaðili fer varðveisla og eyðing gagna samkvæmt fyrirmælum ábyrgðaraðila og viðkomandi vinnslusamningi.

RÉTTINDI EINSTAKLINGA

Einstaklingur á, eftir því sem við á, rétt á aðgangi að eigin persónuupplýsingum, leiðréttingu eða eyðingu þeirra, takmörkun vinnslu, gagnaflutningi og að andmæla vinnslu. Þegar vinnsla byggist á samþykki má afturkalla það hvenær sem er og einstaklingur á jafnframt rétt á að beina kvörtun til Persónuverndar.

SAMSKIPTI OG ÁBYRGÐARAÐILI

Capacent er ábyrgðaraðili þeirrar vinnslu sem félagið ákveður tilgang og aðferðir með.

ENDURSKOÐUN

Persónuverndarstefna þessi er endurskoðuð eftir þörfum, m.a. vegna breytinga á starfsemi, lögum eða reglum um persónuvernd. Gildandi útgáfa stefnunnar er birt á vef Capacent.

Fyrirspurnum og beiðnum vegna persónuverndar má beina til:

Capacent ehf.

Laugavegi 182, 105 Rvík

521022-0350

Netfang: personuvernd@capacent.is

Síðast uppfært: 01-09-2026

■ STJÓRNHÆTTIR
Capacent leitast við að fylgja leiðbeiningum um góða stjórnhætti fyrirtækja, eins og þær eru settar fram í þeirri útgáfu sem gefin hefur verið út á vegum Viðskipta­­ráðs Íslands, Samtökum atvinnulífsins og Kauphöll íslands (Nasdaq Iceland), og við getur átt gagnvart starf­semi félagsins eins og hún er uppbyggð frá einum tíma til annars. Leiðbeiningarnar fela almennt í sér nokkuð ýtarleg tilmæli til viðbótar við lög og reglur sem þegar gilda og fyrirtækjum ber að fylgja hverju sinni.

Meginmarkmið leiðbeininganna er að stuðla að góðum stjórnháttum með því að skýra bæði hlutverk og ábyrgð stjórnar og stjórnenda fyrirtækja og tryggja sem best hlítni við gildandi lög. Leið­beiningarnar auðvelda forráðamönnum að rækja störf sín á ábyrgan hátt og treysta um leið hag hluthafa, starfsmanna og annarra hagaðila.

Með því að fylgja góðum stjórn­háttum og hlíta lögum styrkjum við innviði samfélagsins, fyrirtækja, stofnana og eflum almennt traust. Slík háttsemi styrkir starfs­umhverfi okkar og eykur traust í samfélaginu gagn­vart íslensku viðskiptalífi og hefur þannig um leið áhrif á aukna samkeppnishæfni.

■ STARFSMANNA- OG JAFNLAUNASTEFNA
Capacent leggur ríka áherslu á að ráða til sín hæft starfsfólk og samstarfsaðila sem til hafa að bera viðeigandi hæfni, þekkingu og reynslu til að sinna verkefnum fyrirtækisins og í takt við þær kröfur sem gerðar eru til okkar hverju sinni.

Allar ráðningar skulu þannig byggjast á mati sem tekur meðal annars mið af menntun, starfs­reynslu og persónuhæfi við­komandi eins og skilgreint er fyrir viðeigandi starf eða starfssvið. Þá leggur Capacent áherslu á að fá til liðs við félagið starfsfólk og sam­starfsaðila sem hafa til að bera jákvætt viðhorf og hafa tamið sér heiðarleika, virðingu og samvinnuhæfni.

Capacent leitast við að tryggja jafnrétti innan vinnu­staðarins og við gerum það sem er í okkar valdi stendur til að tryggja jöfn tækifæri og jöfn starfskjör fyrir sambærileg og jafn verðmæt störf óháð kyni, trú eða uppruna. Við leitumst við að fylgja ákvæðum laga nr. 150/2020 um jafna stöðu og jafnan rétt kynjanna og laga nr. 86/2018 um jafna meðferð á vinnumarkaði ásamt öðrum þeim reglum sem gilda almennt á vinnumarkaði hverju sinni og taka m.a. til jafnréttis og jafnrar stöðu.

Það er stefna Capacent að sambærileg laun skuli greidd fyrir sambærileg og jafnverðmæt störf. Þannig er það stefnan að tryggja, í takt við reglur á vinnu­markaði, að hver og einn fái greitt fyrir störf sín að teknu tilliti til menntunar, ábyrgðar, álagi, frammi­stöðu, verðmætis og ríkjandi aðstæðum á vinnumarkaði.

Við leggjum okkur fram um að skapa starfsumhverfi sem er hvetjandi, jákvætt, árangursdrifið, að starfsandi sé góður og starfsfólki líði almennt vel í vinnu fyrir fyrirtækið. Þá er mikilvægt að tryggja að jafnvægi ríki milli vinnu og einkalífs og að tekið sé tillit til þess meðal annars með sveigjan­legum vinnutíma eins og við getur átt.

Capacent leggur áherslu á að starfsfólk sé ábyrgt í starfi sínu og komi fram af fagmennsku fyrir hönd fyrirtækisins, gagnvart sam­starfsfólki, viðskiptavinum og öðrum samstarfsaðilum. Þá gætum við trúnaðar í störfum okkar um málefni félagsins, samstarfsmanna, viðskiptavina og samstarfsaðila um málefni sem trúnaður skal ríkja um eðli máls samkvæmt.

Einelti, kynferðislegt áreiti eða annað form ofbeldis er ekki liðið og er það á sameininglega ábyrgð fyrir­tækisins og starfsfólks að koma í veg fyrir og uppræta slíka hegðun á vinnustaðnum okkar.

Við leggjum áherslu á frumkvæði og samvinnu í starfi og að starfsfólk okkar sýni hvort öðru stuðning. Þannig leggjum við okkur fram um að allir geti þroskast og vaxið í starfi.