Fréttir

Enn minnkar stuðningur við ríkisstjórnina

Stuðningur við ríkisstjórnina minnkar nú sjöunda mánuðinn í röð. Stuðningurinn við stjórnina minnkar um þrjú prósentustig milli mánaða og nú styðja aðeins rösklega 52% stjórnina. Litlar breytingar eru á fylgi flokka milli mánaða. Sjálfstæðisflokkurinn mælist með sama hlutfall og í síðasta mánuði, en ríflega 33% segjast myndu kjósa flokkinn ef gengið yrði til kosninga nú. Fylgi Samfylkingarinnar minnkar um tæpt prósentustig og mælist flokkurinn nú með nær 30%, Vinstri hreyfingin-grænt framboð minnkar um tæplega tvö prósentustig og mælist nú með ríflega 20% fylgi. Framsóknarflokkurinn bætir við sig prósentustigi milli mánaða og mælist nú með liðlega 9%, Frjálslyndir tapa örlítið og mælast nú með rúmlega 4% fylgi og Íslandshreyfingin-lifandi land eykur fylgi sitt um ríflega eitt prósentustig en nær 2% segjast myndu kjósa flokkinn ef kosningar færu fram í dag. Næstum 10% svarenda taka ekki afstöðu eða neita að gefa hana upp og ríflega 12% segjast myndu skila auðu eða ekki kjósa ef kosningar færu fram í dag.

Spurt var:
Ef kosið yrði til Alþingis í dag, hvaða flokk myndir þú kjósa?
En hvaða flokkur yrði líklegast fyrir valinu?
Hvort er líklegra að þú kysir Sjálfstæðisflokkinn eða einhvern hinna flokkanna?
Styður þú ríkisstjórnina?

Niðurstöður sem hér birtast um fylgi flokkanna á landsvísu eru úr símakönnun sem Capacent Gallup gerði dagana 28. maí til 29. júní 2008. Svarhlutfall var um 67%, úrtaksstærð 4.263 manns. Vikmörk eru 0,5-2%.