Fréttir

Gallup spurði nú þriðja árið í röð um ánægju með störf nokkurra þekktra Íslendinga, forseta Íslands, biskups Íslands, borgstjórans í Reykjavík og forsætisráðherra. Nú sem fyrr eru flestir ánægðir með störf Ólafs Ragnars Grímssonar, eða 84,5%, en það eru færri en fyrir ári síðan því þá voru 87% ánægð. Rúmlega 79% eru ánægð með störf Karls Sigurbjörnssonar en voru rúmlega 85% í árslok 1998. Næstum 63% eru ánægð með störf Ingibjargar Sólrúnar Gísladóttur en 78% voru ánægð með störf hennar í fyrra. Fæstir eru ánægðir með störf Davíðs Oddssonar af þessum fjórum, eða 56%, en meira en 68% voru ánægð með störf forsætisráðherra fyrir ári síðan.

Forseti Íslands

Ekki er munur á ánægju með störf forsetans eftir kyni og aldri eða öðrum grunnbreytum. Forsetinn hefur í öll skiptin sem mælt hefur verið notið mestrar ánægju með störf sín.

Biskup Íslands

Konur eru mun ánægðari en karlar með störf biskupsins, rúmlega 84% kvenna eru ánægð með störf hans en tæplega 76% karla. Ánægja fólks vex með störf Karls eftir því sem það eldist. Þannig er tæplega 61% þeirra sem eru 18-24 ára ánægt með störf hans en tæplega 87% þeirra sem eru 55-75 ára. Nokkrar sveiflur hafa orðið í ánægju með störf biskups. Þannig var einungis rúmlega 41% ánægt með störf Ólafs Skúlasonar þegar spurt var 1997. Ánægja með störf Karls hefur hins vegar verið mun meiri þótt hún lækki nú aðeins á milli ára.

Borgarstjórinn í Reykjavík

Fleiri konur en karlar eru ánægðar með störf borgarstjóra, eða 65% kvenna en tæplega 60% karla. Flestir framsóknamenn eru ánægðir með störf Ingibjargar Sólrúnar, eða rúmlega 83%, næstum 81% kjósenda Samfylkingarinnar, tæplega 74% fylgismanna Vinstri hreyfingarinnar - Græns framboðs en 46% sjálfstæðismanna. Ánægja með störf borgarstjóra hafa minnkað talsvert frá því í fyrra en þá var ánægja með störf hans mest, eða 78%.

Forsætisráðherra

Tæplega 62% fólks á aldrinum 18-24 ára eru ánægð með störf Davíðs Oddssonar en ánægjan fer minnkandi eftir því sem fólk eldist þannig að rösklega 51% þeirra sem eru 45-54 ára er ánægt með störf Davíðs. Ánægjan eykst aftur í elsta hópnum 55-75 ára, en tæplega 56% þeirra eru ánægð með störf forsætisráðherra. Tæplega 93% sjálfstæðismanna eru ánægð með störf Davíðs Oddssonar en 58% framsóknarmanna. Á bilinu 18 til 19% stuðningsmanna Vinstri hreyfingarinnar - Græns framboðs og Samfylkingarinnar eru ánægð með störf Davíðs. Ánægja með störf Davíðs er minni nú en fyrir ári síðan en meiri en þegar hún var minnst árið 1997.